မြန်မာနိုင်ငံကုမ္ပဏီများဥပဒေအရ အရေးပါသော ကော်ပိုရိတ်စီမံအုပ်ချုပ်မှုဆိုင်ရာ ဥပဒေမူဘောင် (အပိုင်း ၂)

ဤဆောင်းပါးမှာ ((အပိုင်း ၃) ၌ ဒါရိုက်တာများ၏တာဝန်ဝတ္တရားများနှင့်သက်ဆိုင်သော သြစတြေးလျ နိုင်ငံ၏စီရင်ထုံးရည်ညွှန်းကိုးကားချက်များအပါအဝင်) ၂၀၁၇ ခုနှစ်၊ မြန်မာနိုင်ငံကုမ္ပဏီများဥပဒေအရ ကော်ပိုရိတ် စီမံအုပ်ချုပ်မှုဆိုင်ရာမူဘောင်၏အဓိကအရေးပါသောအချက်များကိုသုံးသပ်တင်ပြထားသော ဆောင်းပါးသုံးပုဒ် အနက် ဒုတိယတစ်ပုဒ်ဖြစ်ပါသည်။ (See part 1 here).

၄။ ဒါရိုက်တာများ နှင့် အရာရှိများ၏တာဝန်များ – ယုံမှတ်အပ်နှင်းမှုတာဝန်များ (Fiduciary Duties) များ စတင်ရာနေရာ

အဘယ်ကြောင့် ဒါရိုက်တာများ၏တာဝန်များကို သတ်မှတ်ထားပါသနည်း။

ဒါရိုက်တာများ၏တာဝန်များကိုသတ်မှတ်ရသည့်အဓိကအကြောင်းရင်းမှာ ကုမ္ပဏီအပေါ် ဒါရိုက်တာများ၏သစ္စာစောင့်သိမှုကို ခိုင်မာစေလိုသောကြောင့်ဖြစ်ပါသည်။ ထိုသို့သောတာဝန်များ သတ်မှတ်ပေါ်ပေါက်လာခြင်းဖြင့် ဒါရိုက်တာများ၏အကျိုးခံစားခွင့်များမှာ အစုရှယ်ယာရှင်များ၏အကျိုး ခံစားခွင့်များနှင့်ကွာခြားကြောင်း တရားဝင်အသိအမှတ်ပြုရာရောက်ပါသည်။ ဒါရိုက်တာများ၏အကျိုး ခံစားခွင့်များ နှင့် အစုရှယ်ယာရှင်များ၏အကျိုးခံစားခွင့်များအကြား ကွာခြားကြောင်းသတ်မှတ်နိုင်သည့် အဓိကနည်းလမ်း ၂ ရပ်မှာ အောက်ပါအတိုင်းဖြစ်ပါသည် –

ဒါရိုက်တာများအနေဖြင့် ကုမ္ပဏီ၏စရိတ်ဖြင့် မိမိအတွက်အကျိုးများသည့်စီးပွားရေးဆိုင်ရာ လုပ်ဆောင်ချက်များ (Self-dealing Transactions) ကို ဆောင်ရွက်ခြင်း။ ဤအခြေအနေကို ထိန်းကျောင်းကြပ်မတ်နိုင်ရန်အတွက် ဒါရိုက်တာများသည် ကုမ္ပဏီ၏အကောင်းဆုံးအကျိုး အတွက်ရှေးရှု၍ လုပ်ဆောင်ရန် နှင့် အကျိုးစီးပွားဝိရောဓိ (Conflicts of Interest) ကို ရှောင်ကြဉ် ရန်တာဝန်ရှိကြောင်း သတ်မှတ်ကြပါသည်။
ကုမ္ပဏီရေးရာကိစ္စရပ်များနှင့်ပတ်သက်၍ ဒါရိုက်တာများက ဂရုတစိုက်ဖြင့် စိစိစစ်စစ်မဟုတ်ဘဲ သတိလွတ်လက်လွတ် ဂရုမစိုက်ဘဲ ပြုမူဆောင်ရွက်ခြင်း။ ဤအခြေအနေကို တည့်မတ်ရန် အတွက် ဂရုတစိုက်ဖြင့် စိစိစစ်စစ်ပြုမူဆောင်ရွက်ရန်တာဝန်များကို သတ်မှတ်ထားပါသည်။

ဒါရိုက်တာများ၏တာဝန်များဆိုင်ရာအယူအဆသဘောထားပေါ်ပေါက်လာရသည့် မူလအရင်းအမြစ် စတင်ရာနေရာမှာ အဘယ်နည်း။

ကုမ္ပဏီတစ်ခု၊ ကုမ္ပဏီပိုင်ပစ္စည်းများ၊ ကုမ္ပဏီရေးရာကိစ္စရပ်များစီမံခန့်ခွဲမှုကို ကြပ်မတ်စိစစ်ရန် လုပ်ပိုင်ခွင့်အာဏာကို ပုံမှန်အားဖြင့် ကုမ္ပဏီ၏ဖွဲ့စည်းပုံအခြေခံစည်းမျဉ်း နှင့် သက်ဆိုင်ရာကုမ္ပဏီများ ဥပဒေအရ ဒါရိုက်တာအဖွဲ့အပေါ် အပ်နှင်းထားလေ့ရှိကြပါသည်။ အဆိုပါလုပ်ပိုင်ခွင့်အာဏာနှင့်အတူ လိမ်လည်ရန် နှင့် မမှန်မကန်စီမံခန့်ခွဲရန်အခွင့်အလမ်းများလည်း ရရှိလာပါသည်။ မိမိပိုင်ပစ္စည်းများ သို့မဟုတ် မိမိနှင့်သက်ဆိုင်သောကိစ္စရပ်များကို စီမံဆောင်ရွက်ရန် အခြားပုဂ္ဂိုလ်တစ်ဦးဦးထံယုံမှတ် အပ်နှင်းထားပါက ထိုယုံမှတ်အပ်နှံခံရသည့်ပုဂ္ဂိုလ်၏မမှန်မကန်သောလုပ်ရပ်များကြောင့် ဆုံးရှုံးနစ်နာမှု များခံစားရနိုင်ခြေအလားအလာရှိပါသည်။ ကုမ္ပဏီများ၏အစုရှယ်ယာရှင်များမှာ ကုမ္ပဏီ၏နေ့စဉ်လုပ်ငန်း ဆောင်တာများကို ပုံမှန်စောင့်ကြည့်စိစစ်နေသူများမဟုတ်ဘဲ အများအားဖြင့် စီမံဆောင်ရွက်မှုတွင်မပါဝင် သည့်ရင်းနှီးမြှုပ်နှံသူများ (Passive Investor) သက်သက်သာဖြစ်ကြရာ အများအားဖြင့် နစ်နာဆုံးရှုံးမှုများ နှင့် ရင်ဆိုင်ရနိုင်ခြေများပါသည်။ ရင်းနှီးမြှုပ်နှံသူများစွာရှိပြီး စနစ်တကျစီစဉ်ဖွဲ့စည်းထားခြင်းမရှိသော အခြေအနေများတွင်မူ ၎င်းတို့၏ဆုံးရှုံးနိုင်ခြေမှာ ပိုမိုကြီးမားပါသည်။

ပုဂ္ဂိုလ်တစ်ဦးက မိမိပိုင်ပစ္စည်းများ သို့မဟုတ် မိမိ၏ကိစ္စရပ်များကို “ယုံမှတ်အပ်နှင်းခံရသူများ” နှင့် “ယုံမှတ်အပ်နှင်းမှုဆိုင်ရာတာဝန်များ” ဟူသည့်အယူအဆသဘောထားဖြင့် အခြားပုဂ္ဂိုလ်တစ်ဦးဦး ထံသို့ ယုံမှတ်အပ်နှင်းရာ၌ ပေါ်ပေါက်လာနိုင်သည့်ဆုံးရှုံးနိုင်ခြေအလားအလာများနှင့်ပတ်သက်၍ အင်္ဂလိပ် ရိုးရာဥပဒေ (English Common Law) (ဗြိတိသျှကိုလိုနီခေတ်အတွင်း မြန်မာနိုင်ငံသို့ရောက်ရှိလာခဲ့သော) တွင် ပြဋ္ဌာန်းထားပြီး ဖြစ်ပါသည်။

A က B ၏ကိုယ်စား ကိစ္စရပ်များကိုဆောင်ရွက်ပေးမည်ဟုဆိုပါက ယုံမှတ်အပ်နှံခြင်း၊ ယုံကြည်ခြင်းဆိုင်ရာဆက်ဆံရေးတစ်ရပ်ပေါ်ပေါက်ပြီး Common Law အရ ယုံမှတ်အပ်နှင်းခြင်း ဆက်ဆံရေး (Fiduciary Relationship) ပေါ်ပေါက်ပါသည်။ A သည် B ၏အကျိုးစီးပွားအပေါ် သက်ရောက်မှုရှိစေရန် လည်းကောင်း၊ B ၏အကျိုးကိုထိခိုက်စေရန်လည်းကောင်း လုပ်ဆောင်နိုင်သည့် လုပ်ပိုင်ခွင့်အာဏာရှိပါသည်။ တစ်ဖန် B သည် B ပိုင်ဆိုင်သည့်ပစ္စည်း သို့မဟုတ် အကျိုးစီးပွားများနှင့် ပတ်သက်သော သတင်းအချက်အလက်များရရှိရန်၊ အကြံဉာဏ်များရယူရန် နှင့်/သို့မဟုတ် တာဝန်ယူမှုရှိရှိ ထိန်းသိမ်းထားရှိခြင်းတို့အတွက် A ကို အားကိုးယုံကြည်ထားပါသည်။

ဤသို့သောအခြအနေတွင် A သည် ယုံမှတ်အပ်နှင်းခံရသူဖြစ်ပြီး ယုံမှတ်အပ်နှင်းခံရမှုဆက်ဆံရေး အားဖြင့် B အပေါ် ယုံမှတ်အပ်နှင်းမှုဆိုင်ရာတာဝန်များရှိသည်ဟု Common Law အရ ယူဆနိုင်ပါသည်။

ယေဘုယျအားဖြင့် ဆက်ဆံရေးတစ်ရပ်သည် ယုံမှတ်အပ်နှင်းသောဆက်ဆံရေးတစ်ရပ်ဟုတ်၊ မဟုတ် စိစစ်ရန်မှာ ဆက်ဆံရေးဆိုင်ရာသဘောသဘာဝ၊ အနေအထား၊ လုပ်ဆောင်ရမည့်တာဝန်များ အပေါ်အခြေခံ၍ တရားရုံးတစ်ရုံးက ဆုံးဖြတ်ရမည့်အကြောင်းခြင်းရာဆိုင်ရာကိစ္စရပ်တစ်ခုဖြစ်ပါသည်။ သို့ရာတွင် Common Law အရ အချို့သောဆက်ဆံရေးအမျိုးအစားများသည် ယုံမှတ်အပ်နှင်းခြင်းဆိုင်ရာ ဆက်ဆံရေးများဖြစ်သည်ဟု အလိုအလျောက်အသိအမှတ်ပြုသတ်မှတ်နိုင်ပါသည်။

ထိုသို့သောဆက်ဆံရေးအမျိုးအစားများအနက်တစ်ခုမှာ – ဒါရိုက်တာ နှင့် ကုမ္ပဏီ၏ဆက်ဆံရေးဖြစ်ပါ သည်။ ဒါရိုက်တာများသည် အမြဲတစေ ကုမ္ပဏီအပေါ် သစ္စာစောင့်သိရန်တာဝန်ရှိသည့်ယုံမှတ်အပ်နှင်း ခံရသူများဖြစ်ကြပါသည်။ ထိုသစ္စာစောင့်သိရန်တာဝန်များတွင် အောက်ပါတို့ပါဝင်ပါသည် –

ကုမ္ပဏီ၏အကောင်းဆုံးအကျိုးအတွက် သဘောရိုးဖြင့်ဆောင်ရွက်ရန်
လျော်ကန်သင့်မြတ်သောလုပ်ငန်းဆိုင်ရာရည်ရွယ်ချက်များအတွက် ဆောင်ရွက်ရန်
လုပ်ငန်းဆိုင်ရာကိစ္စရပ်များကို သေချာစိစစ်သုံးသပ်ပြီးမှ ဆုံးဖြတ်ချက်ချမှတ်ရန်
အကျိုးစီးပွားဝိရောဓိ (Conflicts of Interest) ကို ရှောင်ရှားရန်

စီရင်ပိုင်ခွင့်နယ်မြေအများစုတွင် ဤယုံမှတ်အပ်နှင်းမှုဆိုင်ရာတာဝန်များ (Fiduciary Duties) ကို ကုမ္ပဏီများဥပဒေတွင် တရားဝင် “သတ်မှတ်ထားသည့် သို့မဟုတ် ပြဋ္ဌာန်းထားသည့်တာဝန်များ” အပေါ် အခြေခံ၍ သတ်မှတ်ထားကြပါသည်။ မြန်မာနိုင်ငံကုမ္ပဏီများဥပဒေ (MCL) တွင်လည်း ပုဒ်မ ၁၆၅ မှ ပုဒ်မ ၁၇၂ အထိ ပုဒ်မများတွင် “ဒါရိုက်တာများ နှင့် အရာရှိများ၏တာဝန်များ” ကို စာရင်းပြုစုသတ်မှတ် ပြဋ္ဌာန်းထားပါသည်။ MCL တွင်သတ်မှတ်ထားသည့်အဓိကတာဝန်များ (အင်္ဂလိပ်ဘာသာစကားဖြင့် ရေးသားထားသော MCL) ကိုကြည့်ရှုပါက သြစတြေးလျကုမ္ပဏီများဆိုင်ရာဥပဒေပါတာဝန်များနှင့် ထပ်တူ ကျလုနီးပါးတူညီနေသည်ကို တွေ့ရှိရပါသည်။

သို့ရာတွင် ဒါရိုက်တာများ၏တာဝန်များသတ်မှတ်ထားရသည့်အကြောင်းရင်း နှင့် ရည်ရွယ်ချက်တို့ကို ပိုမိုသိရှိနားလည်နိုင်ရန်အတွက် ဤတာဝန်များ၏မူလဇာစ်မြစ် နှင့် ယုံမှတ်အပ်နှင်းမှုဆိုင်ရာ ဆက်ဆံရေး၏ အယူအဆသဘောတရားကို သိရှိနားလည်ရန်အရေးကြီးပါသည်။ MCL ပါ တာဝန် များသည် ဒါရိုက်တာများအပေါ် အခြားသက်ဆိုင်ရာဥပဒေများအရ သတ်မှတ်သည့်တာဝန်များနှင့် ပတ်သက်၍ မကန့်သတ်ထားကြောင်း MCL ပုဒ်မ ၁၆၄ တွင်လည်း ဖော်ပြထားပါသည်။ ယုံမှတ်အပ်နှင်းမှု ဆိုင်ရာတာဝန်များကို မြန်မာနိုင်ငံ Common Law နှင့်အညီ သတ်မှတ်ပြဋ္ဌာန်းသင့်ပါသည်။ သို့ဖြစ်ပါ၍ ဒါရိုက်တာများ၏တာဝန်များကိုသတ်မှတ်ခြင်း နှင့် ဖောက်ဖျက်ခြင်းဆိုင်ရာကိစ္စရပ်များကို MCL ပါတာဝန် များအပေါ်အခြေခံကိုးကား၍ အမြဲတစေနီးပါး ဆုံးဖြတ်နိုင်သော်လည်း Common Law ဆိုင်ရာ ယုံမှတ် အပ်နှင်းမှုတာဝန်များကိုလည်း ကျင့်သုံးနိုင်သည့်အနေအထားရှိပါသည် (MCL ပါတာဝန်များထက်ပိုမို ကျယ်ပြန့်သော သို့မဟုတ် MCL ပါတာဝန်များနှင့်မတူညီသောတာဝန်များ)။

၅။ ဒါရိုက်တာများ နှင့် အရာရှိများ၏တာဝန်များ – မည်သူတို့မှာ အရေးကြီးသက်ဆိုင်သူများဖြစ်ကြပါသနည်း။

ဒါရိုက်တာများ

MCL ပါ “ဒါရိုက်တာ” ဟူသောအဓိပ္ပာယ်သတ်မှတ်ချက်တွင် ဒါရိုက်တာရာထူးဖြင့်ခန့်အပ်ထား သော ပုဂ္ဂိုလ်များသာမက ဒါရိုက်တာရာထူးဖြင့်ခန့်အပ်ထားခြင်းမရှိသောပုဂ္ဂိုလ်များလည်းပါဝင်ပါသည် –

ဒါရိုက်တာရာထူးဖြင့်ခန့်အပ်ခံရသကဲ့သို့ ထမ်းဆောင်နေသူ၊ သို့မဟုတ်
ကုမ္ပဏီ၏ဒါရိုက်တာများကို ၄င်း၏ညွှန်ကြားချက် သို့မဟုတ် ဆန္ဒနှင့်အညီလိုက်နာ ဆောင်ရွက်စေရန် သို့မဟုတ် ထိုသို့လိုက်နာဆောင်ရွက်စေရန် ညွှန်ကြားချက်ပေးသူ သို့မဟုတ် ဒါရိုက်တာအဖွဲ့က ကျင့်သုံးဆောင်ရွက်နိုင်သည့် အခွင့်အာဏာများကို ကျင့်သုံးဆောင်ရွက်သူ သို့မဟုတ် ထိုသို့ကျင့်သုံးဆောင်ရွက်မှုကို ထိန်းချုပ်သူ

ဒါရိုက်တာစကားရပ်အတွက် ဤအဓိပ္ပာယ်သတ်မှတ်ဘောင်အတွင်း ကျရောက်သောမည်သူမဆို MCL ပါ ဒါရိုက်တာများ၏တာဝန်များ (ဒါရိုက်တာတာဝန်များအပါအဝင်) ကိုလိုက်နာထမ်းဆောင် ရမည်ဖြစ်ပါသည်။

ဒါရိုက်တာများအဖြစ် တရားဝင်ခန့်အပ်မခံရသော်လည်း လက်တွေ့တွင် ၄င်းတို့ဆောင်ရွက်သည့် လုပ်ဆောင်ချက်များ သို့မဟုတ် ကျင့်သုံးသည့်တာဝန်များကြောင့် ဥပဒေအရ ဒါရိုက်တာများအဖြစ် သတ်မှတ်ခံရသည့်ပုဂ္ဂိုလ်များဆိုင်ရာအယူအဆသဘောထားနှင့်ပတ်သက်၍ အောက်ပါအတိုင်း အုပ်စု ၂ မျိုးခွဲခြားနိုင်ပါသည် –

လက်တွေ့တာဝန်ထမ်းဆောင်နေသည့်ဒါရိုက်တာများ (De facto Directors) – တွင် အောက်ပါ ပုဂ္ဂိုလ်တို့ပါဝင်ပါသည် –
ဒါရိုက်တာအဖြစ်ခန့်အပ်ခံရသော်လည်း ထိုခန့်အပ်ခံရမှုမှာ တရားဝင်မဟုတ်သောသူ (ဥပမာ – ခန့်အပ်မှုလုပ်ငန်းစဉ်တွင် ချို့ယွင်းချက်တစ်စုံတစ်ရာရှိနေခြင်း သို့မဟုတ် ဒါရိုက်တာအဖြစ် ၄င်း၏ရာထူးသက်တမ်းမှာ ကုန်ဆုံးပြီးဖြစ်ကာ ၄င်းတို့ကို ရာထူးမှ တရားဝင်ဖယ်ရှားခြင်းမရှိသေးခြင်း သို့မဟုတ် ဒါရိုက်တာ ရာထူးမှ နုတ်ထွက်ပြီး ဖြစ်သော်လည်း ဒါရိုက်တာ၏တာဝန်များကိုဆက်လက် ထမ်းဆောင်လျက်ရှိခြင်း)၊
လက်တွေ့တွင်ဒါရိုက်တာအဖြစ်တာဝန်ထမ်းဆောင်လျက်ရှိသော်လည်း ဒါရိုက်တာအဖြစ် တရားဝင်ခန့်အပ်မခံရသူ သို့မဟုတ် ဒါရိုက်တာအဖြစ် တရားဝင်ရည်ညွှန်းခြင်းမခံရသူ။ (၁) အဆိုပါပုဂ္ဂိုလ်သည် ထိပ်တန်းစီမံခန့်ခွဲမှုအဖွဲ့၏တာဝန်များကိုထမ်းဆောင်သူများ ဟုတ်၊ မဟုတ်၊ (၂) ကုမ္ပဏီနှင့် ဆက်သွယ်ဆောင်ရွက်နေသူများက ထိုပုဂ္ဂိုလ်ကို မည်သို့လက်ခံ ထားပုံ၊ (၃) ကုမ္ပဏီ၏အရွယ်အစား နှင့် ကုမ္ပဏီတွင်း ဖွဲ့စည်းမှုပုံစံ စသည့်အချက်များ အပေါ်အခြေခံ၍ ဤကိစ္စကို တရားရုံးက စိစစ်သုံးသပ်မည်ဖြစ်ပါသည်။
Shadow ဒါရိုက်တာများမှာ – ဒါရိုက်တာများအဖြစ်ခန့်အပ်မခံရသောပုဂ္ဂိုလ်များဖြစ်ကြ သော်လည်း အမှန်တကယ်ဒါရိုက်တာများက ၄င်း၏ညွှန်ကြားချက်များ သို့မဟုတ် ဆန္ဒများနှင့် အညီ ဆောင်ရွက်ရပါသည်။ –
ဒါရိုက်တာများအဖြစ် ၄င်းတို့လုပ်ဆောင်သည့်ဆောင်ရွက်ချက်များ၊ ဆုံးဖြတ်ချက်များနှင့် စပ်လျဉ်း၍ ဒါရိုက်တာများက အဆိုပါ Shadow ဒါရိုက်တာ၏ သဘောထားဆန္ဒများ သို့မဟုတ် ညွှန်ကြားချက်များကို (အများအားဖြင့် ဖြစ်စေ၊ အမြဲတမ်းဖြစ်စေ) လိုက်နာ ရမည်ဖြစ်ပါသည်။
ဒါရိုက်တာများက အဆိုပါပုဂ္ဂိုလ် Shadow ဒါရိုက်တာဖြစ်မှုအတွက်တာဝန်ရှိသော လုပ်ငန်းဆိုင်ရာလုပ်ဆောင်ချက်တစ်ရပ်အပေါ် ထိုပုဂ္ဂိုလ်က ညွှန်ကြားချက်ပေးရန် မလိုအပ် ပါ။
ပုဂ္ဂိုလ်တစ်ဦးသည် ၄င်း၏အသက်မွေးဝမ်းကျောင်းဆိုင်ရာတာဝန်တစ်ရပ်ကို နည်းလမ်း တကျလုပ်ဆောင်ခြင်းအားဖြင့်ဖြစ်စေ၊ ဒါရိုက်တာများနှင့်လုပ်ငန်းဆိုင်ရာဆက်နွှယ်မှု တစ်ရပ် (ဥပမာ – ပြင်ပရှေ့နေများ၊ ရင်းနှီးမြှုပ်နှံမှု ဘဏ်လုပ်ငန်းရှင်များ၊ စာရင်းစစ်များ) ကြောင့်ဖြစ်စေ ပေးအပ်သောအကြံဉာဏ်များကို ဒါရိုက်တာများက လက်ခံဆောင်ရွက်ခြင်း ဟူသောအကြောင်းရင်းတစ်ခုတည်းအပေါ်အခြေခံ၍ အဆိုပါပုဂ္ဂိုလ်ကို Shadow ဒါရိုက်တာ အဖြစ် သတ်မှတ်၍မရပါ။

မြန်မာနိုင်ငံတွင် “အမည်ခံ (Nominee)” ဆက်ဆံရေးစနစ်များ နှင့် ပုံစံများကို ကျယ်ပြန့်စွာကျင့်သုံး ကြလေ့ရှိရာ မြန်မာနိုင်ငံတွင် Shadow ဒါရိုက်တာများစွာရှိနေနိုင်ခြေများပါသည်။ အဆိုပါ Shadow ဒါရိုက်တာ များအားလုံးသည် သက်ဆိုင်ရာကုမ္ပဏီများက တရားဝင်ခန့်အပ်ထားခြင်းမခံရသော်လည်း ဒါရိုက်တာများ၏ တာဝန်များနှင့်အညီ အမှန်တကယ်ဆောင်ရွက်ကြသူများ ဖြစ်ကြပါသည်။

အရာရှိများ

MCL တွင် အရာရှိများကို အောက်ပါအတိုင်းအဓိပ္ပာယ်သတ်မှတ်ထားပါသည် –

ကုမ္ပဏီတစ်ခုခု၏အရာရှိဆိုသည်မှာ –

ကုမ္ပဏီ၏စီးပွားရေးလုပ်ငန်းအားလုံးကိုလည်းကောင်း၊ အဓိကအပိုင်းကိုလည်းကောင်း အကျိုး သက်ရောက်စေမည့်ဆုံးဖြတ်ချက်များချမှတ်ဆောင်ရွက်သူ သို့မဟုတ် ထိုသို့ချမှတ်ဆောင်ရွက်ရာ တွင်ပါဝင်သူ၊ သို့မဟုတ်
ကုမ္ပဏီ၏ဘဏ္ဍာရေးဆိုင်ရာခိုင်မာတောင့်တင်းမှုကို သိသာစွာအကျိုးသက်ရောက်စေနိုင်သည့် ရာထူးနေရာကို ရရှိထားသူ

ကို ဆိုလိုပါသည်။

“အရာရှိ” ဟူသောစကားရပ်၏အဓိပ္ပာယ်ဖွင့်ဆိုချက်တွင် ကုမ္ပဏီတစ်ခု၌ အဆိုပါပုဂ္ဂိုလ်ကထမ်းဆောင် သော တာဝန်အမျိုးအစားကို သတ်မှတ်ထားပါသည်။ အဆိုပါပုဂ္ဂိုလ်အနေဖြင့် ဒါရိုက်တာတစ်ဦးကဲ့သို့ အလားတူ တာဝန်ထမ်းဆောင်ရန် သို့မဟုတ် အလားတူရာထူးဖြင့်ထမ်းဆောင်ရန် မလိုအပ်ပါ။ အဆိုပါအဓိပ္ပာယ် ဖွင့်ဆိုချက်တွင် ကုမ္ပဏီ၏လုပ်ငန်းအားလုံးကိုလည်းကောင်း၊ အဓိကအပိုင်းကိုလည်းကောင်း အကျိုးသက်ရောက် စေမည့်ဆုံးဖြတ်ချက်များချမှတ်ခြင်း “သို့မဟုတ် ချမှတ်ရာတွင်ပါဝင်ခြင်း” ဟူသောအချက်ပါဝင်သည်ကို သတိပြု သင့်ပါသည်။ သို့ဖြစ်ရာ ပုဂ္ဂိုလ်တစ်ဦးသည် အရာရှိဖြစ်ရန်အတွက် အရေးကြီးသောဆုံးဖြတ်ချက်များချမှတ်ရန် တာဝန်တစ်ခုတည်းကိုသာ တာဝန်ယူထမ်းဆောင်ရန်လိုအပ်မည်မဟုတ်ပါ။

ကုမ္ပဏီ၏အတွင်းရေးမှူးများ နှင့် ဘဏ္ဍာရေးအမှုဆောင်အရာရှိချုပ်တို့သည် ၄င်းတို့၏တာဝန်များဆိုင်ရာ သဘောသဘာဝအရ အရာရှိများဖြစ်ကြပါသည်။ အခြား “C-level Executives” များသည် အများအားဖြင့် အရာရှိများဖြစ်ကြပါသည်။

ဒါရိုက်တာများအားလုံး (လက်တွေ့တာဝန်ထမ်းဆောင်နေသည့်ဒါရိုက်တာများ (De facto Directors)) နှင့် Shadow ဒါရိုက်တာများ) နှင့် အရာရှိများသည် MCL အရ ဒါရိုက်တာများ နှင့် အရာရှိများ၏တာဝန်အသီးသီးကို ထမ်းဆောင်ရန်တာဝန်ရှိပါသည်။

မြန်မာနိုင်ငံကုမ္ပဏီများဥပဒေအရ အရေးပါသော ကော်ပိုရိတ်စီမံအုပ်ချုပ်မှုဆိုင်ရာ ဥပဒေမူဘောင် (အပိုင်း ၂)

Recent Posts

SUBSCRIBE TO OUR MAILING LIST